粵語散文：《熱流涼風》

　　日月交替，水流從不止息。止息唔記得，自已點黎依度，又點解係度。茫茫大海，止息只有身下依隻木船仔，任由水流引領，風向導航。

　　夏日炎炎，汗水逐啲逐啲沾濕止息件杉，止息索性除佢落黎，赤身攤係度。船仔唔大唔細，啱啱夠一個人瞓低。係咁樣嘅天氣，止息最鍾意攤喺度，等身上嘅熱力陰啲陰啲散落木面。晏晝個海喺咁靜，眯埋雙眼，就得返水浪聲同自己嘅呼吸聲。止息聽住水浪點樣將佢帶到一個又一個地方。止息問過無數次﹐自己點解係度......呢個旅程有冇結局，如果有，又係咪可以解釋到所有野□□從來都冇人俾到答案佢。

　　「我想同你一齊，兩個人生活落去。」向止息提出嘅，係止息愛過嘅人。係漫長、見唔到盡頭嘅旅程，止息有過短暫、稱得上幸福嘅時光。止息曾經以為，只要自己唔放棄，兩個人就會有一個完整嘅結局。兩個人坐唔同嘅船，依然相遇、相愛，咁奇妙嘅緣分，又點會唔係命定嫁呢？引領佢哋嘅水流係一致，照耀佢哋嘅陽光係溫暖，撫摸佢哋嘅風係帶甜。止息用衫上嘅布綁住對方嘅船，可惜個結無幾耐就鬆開。兩個人望住塊布跌落水面，然後慢慢、慢慢咁沉，最後消失係黑暗之中。

　　有一晚，橫風橫雨，海浪失去規律咁，大大細細，左面冚一個，右面冚一個。好快，兩隻船被海浪衝開。止息起勢咁扒......博命咁扒......希望戰勝強風大浪，返去愛人身邊，將瞬間變成永恆......但佢點努力都阻止唔到，阻止唔到無情嘅大自然。雨停喇，係黑媽媽嘅海中心，得返止息一個。

　　夏日炎炎最好眠。海面鋪左黃金咁，閃亮又耀眼。半夢半醒之間，止息諗起愛人，諗起千千萬萬同佢擦身而過嘅人......佢識嘅人、佢唔識嘅人......途經幾多山峰，越過幾多急流，周遭風景千變萬化，止息嘅旅程從冇停止。

　　「你哋會唔會覺得好孤獨？」好朋友曾經問。止息係旅程中遇過好多稱得上好朋友嘅人，水流將佢哋聚集一齊，又係適當嘅時候將佢哋分開。「我曾經以為﹐我係呢個世界最孤獨嘅人。我一直以為其他人都幸福快樂，只有我係大海漂浮，承受孤獨。直至遇到你哋，成為朋友。透過你哋，我先明白每個人都係孤獨咁流浪。諗到呢度，我就唔覺孤單......什至有種感覺，每個活著嘅人都係我同伴。」止息有時會諗起朋友嘅呢番說話。

　　止息係旅程中同唔少人結交，聽佢哋分享故事。佢見過軟弱嘅人、自私嘅人、懶惰嘅人、殘忍嘅人，止息睇唔起呢啲人，不齒佢地嘅生活方式，什至憎恨佢哋。如果一切都係水流嘅引領﹐而每個人都只係無奈又孤獨嘅流浪者﹐係咪意味住止息應該將呢啲人嘅醜惡歸因生命嘅流向，體諒佢哋背負嘅孤獨？正如佢都想被人體諒，正如佢都想為自己嘅醜惡辯解。

　　太陽帶住自身嘅光芒，埋落雲堆，最後係地平線上消失。止息坐起身，褸返件衫，享受日落帶黎嘅涼爽。逐漸明亮嘅星空下，止息同好多人一樣，繼續無盡嘅旅程。